O pasado 15 de xullo, as alumnas Jimena, Alba, Ainhoa e Ángela, de 4º da ESO, viviron unha experiencia inesquecible: a presentación do seu proxecto QUITINA na sede das Nacións Unidas en Nova York, no marco do acto Youth as Agents of Change, organizado por EduCaixa.
Durante o evento, as estudantes expuxeron diante de líderes internacionais unha proposta innovadora e sostible para combater a contaminación mariña xerada polos palillos plásticos das bateas galegas. O proxecto consiste no deseño de palillos biodegradables elaborados con cunchas de mexillóns, ostras, vieiras e algas, materiais naturais que permiten substituír os actuais compoñentes plásticos por unha alternativa funcional e ecolóxica, aproveitando ademais os refugallos da industria marisqueira.
As alumnas tiveron a oportunidade de defender o proxecto ante figuras clave do sistema das Nacións Unidas e doutras institucións internacionais, como:
Héctor Gómez, embaixador representante permanente de España ante a ONU.
Wook-Jin Chang, xefe da sección de ONG do ECOSOC.
Dra. Priya Joshi, investigadora principal da UNESCO
Gwynne Gauntlett, directora de participación dixital do PNUD
Joan Rosas, director da oficina de representación da Fundación “la Caixa”
Ann Nicol, directora executiva de UNA-NYC
Ademais, participaron nun panel de expertos, onde recibiron feedback moi positivo sobre a viabilidade e o impacto ambiental do proxecto.
O paso pola sede da ONU foi só unha parte dunha viaxe transformadora. Como gañadoras do Campus EduCaixa 2025, celebrado en Barcelona, as alumnas tiveron a oportunidade de visitar e coñecer expertos e investigadores nas universidades de Harvard, Yale e no MIT.
Desde o colexio queremos felicitar a Jimena, Alba, Ainhoa e Ángela polo seu traballo e compromiso.
Noticias en prensa:
